黃嘉雯泰國旅行返港　機場檢測中招即時停工隔離

前港姐冠軍黃嘉雯於台慶夜後到泰國旅行，雖然旅途相當愉快，但返港時於機場做檢測竟然確診，中招的她現時正於家中隔離。嘉雯接受東網獨家訪問時謂：「上機前做快測都冇事，點知落機時做核酸話我中咗，依家為止快測我都仲係一條線，可能只係好少嘅病菌，不過我都冇咩病徵，只係有少少喉嚨痛，仲好精神，之前嗰個月都好忙，依家當喺屋企休息吓，煮吓飯仔、執吓屋睇吓書，養吓身子都幾好。」本身嘉雯要為《歡樂滿東華》綵排及錄影《流行都市》、J2節目，但因為中招要全部取消，就連之前港姐慧妍雅集活動都無奈缺席。

此外，嘉雯都PO了一張雪櫃相於社交平台，相中的雪櫃爆滿，內裏有蔬菜、生果、雞蛋等，完全足夠她於隔離期食用，她更配文：「從來無試過個雪櫃爆到咁，食成個禮拜都未必食得晒！」