Lokman孖AK飛抵加拿大　粉絲爭相送花逼爆機場

男團MIRROR於7月底在紅館騷發生嚴重事故而休團2個月，因而影響到ViuTV重頭戲《全民造星V》要延期半年播出。MIRROR休團2個月後，各成員現已重新出發投入工作，正、副隊長Lokman（楊樂文）與Anson Kong（江𤒹生）本來係喺9月飛加拿大為《造星V》進行海選，旅程延至昨晚（30日）起行，佢哋連同工作人員一行10人出發到溫哥華，吸引半百粉絲到機場送機，而佢哋會喺當地舉行見面會同埋挑選新人參加。到了今日（1日）下午，AK同Lokman已飛抵加拿大AK，佢於社交網上載飛機降落嘅片，話：「Arrived！」當地一大班粉絲知道佢哋嚟到，都去咗接機，逼爆機場，佢哋一步出閘口，粉絲即一湧而上，將佢哋包圍，仲為佢哋送上花同禮物添！

而佢哋喺香港出發前於登機櫃位拍攝花絮，一眾到嚟送機嘅鏡粉本來情緒高漲，不斷興奮尖叫，但知道要開機拍攝就好識做乖乖收聲，令拍攝可以順利進行，而佢哋喺鏡頭前表現出雀躍心情，表達等咗咁耐終於可以再飛嘅喜悅！拍攝完畢後佢哋喺拍攝團隊同航空公司職員保護下，走到離境大堂，被幾十夠鏡粉包圍嘅佢哋幾經辛苦下步入禁區，臨走前佢哋仲向粉絲鞠躬道謝。