劉穎鏇劉佩玥升呢做「主」 孖咇玩神秘
20221204
東網電視
更多新聞短片
![](/hk/bkn/cnt/entertainment/20221204/photo/bkn-20221204000057333-1204_00862_001_01p.jpg?20221204082331)
近年實力與人氣急升的陳山聰,明年1月再度與監製文偉鴻班底合作新劇,兩位「J女郎」劉佩玥及劉穎鏇更升呢,首度擔正女主角!由於劇中動作連場,新加入的張振朗、丁子朗與郭柏妍都要大鬥「功」力,希望於最短時間內操到至Fit狀態。
陳山聰今年成績大勇,在無綫劇集《美麗戰場》及《超能使者》中的「王一言」及「膠勇」兩個角色,均被激讚演得出色,在一眾藝人中獲得15項最多台慶頒獎禮提名,亦是今年的「視帝」頂頭大熱,來勢洶洶!
據知,監製文偉鴻(Jazz)明年1月將開拍新劇《奪命提示》,並以《超》劇原班人馬上陣,當中包括陳山聰、劉佩玥(Moon)、劉穎鏇(Tiffany)及林子善,雖然陳展鵬與唐詩詠分別因拍攝《逆天奇案2》及已離巢而未能參演,但會加入張振朗及《下流上車族》CP郭柏妍與丁子朗。Jazz每套劇集都有噱頭,繼《同盟》、《城寨英雄》、《鐵拳英雄》、《隱形戰隊》及《超能使者》後,今次以神秘訊息調查科作核心,拆解離奇命案,劇情緊張懸疑得來帶點科幻感。
4主角戲份平均
《奪》劇男、女主角分別是陳山聰及Moon、張振朗及Tiffany兩Pair,據知4人戲份平均,而Moon及Tiffany已是監製Jazz的寵兒,近年每部劇都有她們份,今次更齊齊升呢女主角成為「J女郎」,定能大顯身手。早前在《美》劇演技出色、有份提名「視后」的Moon受訪,她說:「咩角色我都會盡心盡全力去做,至於故事方面好神秘,監製只講咗三分之一畀我哋知,不過Jazz今次好強調要訓練肌肉,同埋要打,所以預咗會周身傷㗎喇!上次拍《隱形戰隊》着重槍械訓練,今次就要上堂,學埋身搏擊技巧。」而外形及身手愈來愈好的Tiffany直言好開心:「超級期待,依家開始鍛煉體能,因為聽過個古仔,Jazz都話好多埋身肉搏場口,係一個新挑戰。(今次同振朗演一對?)同佢識咗好耐,之前一齊拍《靈戲逼人》,但今次首度演情侶,希望帶到新鮮感畀觀眾。」
新組合撞出新鮮感
山聰亦對這個新組合非常期待:「我未正式同振朗合作過,今次係第一次,雖然好多劇入面都有我同Moon出現,但未試過咁多同場,所以希望有火花,滿心期待嘅!」對於Moon升呢「女一」,山聰大讚:「第一次合作係2015年嘅《殭》,睇到佢呢幾年好畀心機,喺《超能使者》演得非常好,我哋私底下食飯都話一齊加油,希望再畀到觀眾驚喜。」
而振朗入行拍攝的《法網狙擊》亦是由Jazz監製,相隔多年再聚頭,他表示很開心:「Jazz嘅劇集風格向來特別,我睇《超能使者》都睇到毛管戙!首次同山聰合作,都想向佢學習吓嗰份堅持。今次打鬥一定有,都要操番體能,同呢班咁Fit、火力十足嘅團隊合作,自己都要Fit啲。」
陳展鵬撞期約定再合作
視帝陳展鵬本有份拍攝《奪命提示》,無奈因撞期而告吹!由劉家豪擔任總監製、展鵬偕林夏薇擔演的《逆天奇案》,去年5月播放時收視、口碑俱佳,早已準備開拍續集,但因疫情關係一拖再拖,現已定於明年初正式開拍,與《奪》劇撞到應。
展鵬受訪時說:「冇辦法,真係撞咗,《逆天》第一輯收視好好,內地口碑亦相當唔錯,所以《逆天2》要拍㗎喇!不過大家有緣總有機會合作到,咁多年同Jazz(監製文偉鴻)、山聰合作都好有默契,希望佢哋今次都有好好嘅火花,期待2024年再合作啦!」他趁《逆天2》開拍前飛往馬來西亞搵真銀,拍攝代言廣告。