郭柏妍「洗腦魔音」令網民徹夜難眠:我好畀心機練!

2022年12月04日 17:21
東網電視
更多新聞短片
昨晚(3日)舉行的《歡樂滿東華2022》花生位多多,其中一個令網民通宵達旦狂Loop熱議的花生位,是憑劇集《下流上車族》中「芊芊」一角成功入屋的郭柏妍,她孖住劇中飾演其父的林敏驄、文凱婷、何晉樂等獻唱主題曲《一家人》時,其歌聲可謂「來回地獄又折返人間」,全程處於五音不全,甚至走音邊緣,更以一人之力,令其他人都爭點甩Beat!
至於另一焦點,是她和邵珮詩等熱舞,身穿背心及熱褲的她們狂跳狂扭,雖然她們封胸只騷腿,但瘋狂晃動上身,「Shake Shake奶」效果震撼視覺!大批網民均指郭柏妍的魔音令人難忘得徹夜難眠,更是「洗腦魔音」,其歌聲植入腦中揮之不去,更有網民笑指上天很公平:「上天給郭柏妍美貌,但奪走佢嘅歌喉!」但也有網民讚她唱得可愛!
郭柏妍接受東網訪問稱很開心和林敏驄等人合唱,大讚他們唱得好,她說:「我一直好畀心機去練習,當我知道要唱《一》,每分每秒不停咁練習,無論係化妝或換衫都爭取時間去練,好多謝佢哋一路帶住我唱,希望大家睇得開心,可以為慈善出一分力都好開心。」對於被指是「魔音」,她說:「大家包容吓我,我下次一定出200分努力,畀個機會我OK?下次一定會唱得好畀大家聽,一定會省返靚Daddy(林敏驄)首歌。」林敏驄曾讚她是「行走的CD」,她說對方才算是,不用熱身已唱出水準。
自言和邵珮詩第2次合作的郭柏妍,對於被指有「Fing胸」場面,她說:「我跳時冇特別去留意呢樣嘢,我骨架比較細,好易畀人睇到冇力,所以着重喺跳舞力度上面,冇理到其他位置,最緊要跳得好睇,邵珮詩都跳得好,見佢仲可以落到十級樓梯,非常勁!初時擔心佢fing好多次頭會暈,但佢冇,仲跳得非常之靚!」
而林敏驄對於「囡囡」郭柏妍初試啼聲就一鳴「驚」人被封為「魔音天后」,事後阿驄更將合唱短片擺上網,不過明玩嘢指要「大義滅聲」,狠心將郭柏妍的歌聲Cut走,笑寸囡囡歌喉。
他接受訪問時,不停哈哈大笑,自言此舉是用心良苦:「我係鞭策緊佢,我都估唔到佢殺傷力咁大嘅。(你Cut咗佢把聲,所為好殘忍喎?)我要調教吓佢,搵日約佢上嚟,等我打通佢任督二脈,不過佢沖涼時先唱歌,我要被逼睇佢沖涼喎。」
他又覺得「囡囡」洩露「魔」性,跟幕後人員有關:「其實台吓嗰啲,佢一開聲知佢咁,就應該畀啲和音同唔好推到佢把聲咁大嘛!(同佢合唱都忍到笑喎?)因為我都聽唔到佢唱歌,之前只係問吓佢練成點,未真係聽過佢現場唱,我諗佢因為之前食咗辣辣壽司,啲壽司同佢八字唔夾,先引發到佢啲魔性出嚟啫,又或者同佢當時太驚有關啫,其實都唔係全首歌走晒音,走少少之嘛。(會唔會作番首歌畀佢一雪前恥?)咁首歌要叫《魔性大發》啦,哈哈哈,或者搵佢同總經理合唱啦,佢哋兩個歌聲都差唔多。」
問可覺得魔音成囡囡的污點?他反問說:「點會呀?其實唔好咁認真啦,大家都係玩吓啫,本身我以為只係我同文凱婷合唱,佢哋幾個嚟呼籲吓,點知佢又唱,可能因為佢哋爆紅咗啦。」他相信囡囡不會為此事不開心,因她本身性格開朗,所以毋須太擔心,但樂意親自去「呵番」囡囡,還會補相上載,留言:「芊芊加油」,又說:「咁先好呀,由谷底開始,咁先每次都會有進步呀。」