王志良梁非同演《新胡不歸》獲陳寶珠蕭芳芳「加持」

20221206
東網電視
更多新聞短片
新編粵劇《新胡不歸》將於2023年2月7至8日,假西九文化區戲曲中心大劇院演出一連兩場,後天(8日)公開發售門票。新劇改編自陳寶珠及蕭芳芳合演的經典電影《七彩胡不歸》,該劇藝術總監尹飛燕、策劃人彭美施、主角王志良與梁非同等今日(6日)出席發布會,陳寶珠、蕭芳芳及薛家燕以不同方式為該劇作「加持」。
薛家燕:值得我哋支持
當年飾演文萍生的陳寶珠以口訊留言:「多謝彭美施,我哋好開心睇到一個新嘅《胡不歸》作品,Thank You !」飾演趙顰娘的蕭芳芳則以短訊寫上:「厲害了彭美施,又是出品人又總策劃,恭喜賀喜,好感動……剛收到寶珠短訊,會馬上告訴她。」薛家燕更拍片細訴當年拍攝過程:「知道施姐開新劇目《新胡不歸》,同我好有淵源,當年同寶珠、芳芳合演《七彩胡不歸》,我演春桃都有得發揮,當年好賣座,今次係向《七彩胡不歸》致敬,非常感激,喺度預祝演出成功,王志良同梁非同兩位都好優秀,今次肩負傳承責任,真係好值得我哋支持!」
彭美施在會上感謝尹飛燕擔任藝術總監,大讚首次合作的王志良與梁非同是黃金組合:「《新胡不歸》其中亮點係靚人、靚衫同靚景,可以畀劇迷賞心悅目感覺。年輕一代演員有年輕一代嘅演繹方法,希望兩位可以為角色注入新嘅生命力。《胡不歸》係屬於一個愛情、婆媳嘅倫理劇,好講求唱腔、造手同身段,係傳統考牌戲,好彩有燕姐坐鎮做藝術總監,我就安心好多。」
讚新一代學習能力高
至於當年於《七彩胡不歸》為蕭芳芳擔任幕後代唱的尹飛燕,直言新劇令回憶湧現:「當年有段數白欖係芳芳姐自己唱,佢唱得好好聽。」談到兩位新生代的文戲經驗尚淺,演出或會吃力,燕姐表示認同:「因為武打好硬撐,忽然要佢哋柔弱比較辛苦,主力要谷佢哋呢方面。」她笑言自己是嚴師:「我教咗自己嗰套畀你,你要令到觀眾接受,就要先做畀我睇,聲音、感情同運用要做到得為止。」她讚新一代學習能力高,只要從旁指導一下便可。
才子配佳人 文場考驗內心戲
今次選角創新起用文武生王志良飾演文萍生,配搭新生代花旦梁非同飾演趙顰娘,締造完美才子佳人嶄新組合,為青春版《新胡不歸》注入新的生命力。兩人大表榮幸,坦言此劇以文戲為主,有一定壓力,梁非同說:「要燕姐教我哋點樣處理角色,文場好講人生經驗同內心戲,顰娘本身係弱質女子,受到家姑咁對佢,好委屈,我哋現代女性要揣摩古代女性嗰種感覺係好難。」
王志良坦言爆喊戲很大挑戰:「我好鍾意『哭墳』同『慰妻』兩場戲,文萍生性格懦弱,見到顰娘畀母親趕走,心情悲憤無從發洩,喺『哭墳』可以爆發出嚟。」梁非同表示喜愛尾場『天宮』一幕,能將當中一段歌舞於舞台上重現感到高興,會以戰戰兢兢及敬畏的心情演好角色。