朱晨麗大讚朱敏瀚身材好　僅次於湯告魯斯及C朗

藝人朱敏瀚（朱仔）與朱晨麗（朱朱）今日（7日）為無綫劇集《輕．功》宣傳，朱仔透露劇中他有裸露除衫騷肌場口，但他對自己身材不太滿意：「當時疫情係最嚴重，健身室關咗，我靠屋企有限嘅器材去操肌，係我咁多次除衫戲之中最吃力一次，呢次冇之前操得咁好，效果同我想像中有差距。」朱朱表示自己首天開工正是朱仔的除衫戲，笑言：「導演好益我，朱仔身材好好，係我心目中Top3，我都係有見過世面。（其他兩個係邊個？）湯告魯斯同C朗。」朱仔坦言每部劇都要除衫戲，所以要努力保持身形，朱朱指對方除開有條路。

另外，朱仔憑《痞子殿下》及《輕．功》分別提名男主角及男配角，他自認好彩，之前連續兩年提名皆有獎，問到今年想獲哪個獎項？他說：「希望《痞子殿下》可以攞到拍檔獎，因為大家合作得好開心，呢個獎好有意義。」而朱朱有幸獲提名，她認為作為演員，最重要是努力演好角色，其他要靠觀眾。提到朱朱近日生日，她感恩有眾多朋友為她慶生，並吃了多個蛋糕：「可能都食咗20個蛋糕，好驚肥，所以我嘅生日願望係唔好肥。」