魏浚笙新歌MV女主角人選　想搵日系女生合作

藝人魏浚笙（Jeffrey）今日現身品牌活動，提到聖誕，他表示很想到外地旅遊，但未知有否假期，他說：「我由細到大都未試過喺外國過聖誕，好想感受吓外國氣氛，如果可以過一個白色聖誕會好開心。」現時Jeffrey正忙於籌備人生首隻新歌：「仲未正式錄音，依家練習中，又要搵人填詞，我都好想首歌盡快面世。（會唔會拍MV？）會，諗緊女主角人選，但暫時未諗到，我想係日系女生，因為我最近睇緊日劇《First Love初戀》，所以都好想有種浪漫嘅日系感覺。（去日本取景？）我都想，不過我係獨立歌手，啲製作費自己畀，睇嚟就唔得喇！（預計要投資幾多？）都要6位數。（搭膊頭搵朋友幫手？）工作都係要畀錢，要尊重對方嘅專業。（女友幫手？）女友就唔會幕前出鏡，但會以經理人身份策劃好多嘢。」