裕美與父失聯22年　網上尋人有突破性進展

中日混血兒裕美與爸爸失聯逾20年，年前佢放下對父親嘅仇恨決心尋父，試過網上尋人及到香港日本領事館交低資料等，但依然音信全無，不過佢未有放棄，日前喺社交網晒出童年時與父親嘅合照，發出尋人啟示：「尋爹啟示：我阿爸『和田 具久』身高6尺幾，日本茨城人，如見到他請聯絡我，自我12歲後已失聯。」而近日終於有新進展，有熱心網友從網上搜到一個名為「和田具久」嘅社交用戶，其頭像更係裕美嘅童年照，令裕美心情非常複雜：「有熱心嘅網友傳了給我，不知是否真的是我爸爸，現在心情非常滾動，但相中照片是我。」有網友提醒佢小心受騙，佢表示：「是的，我正在小心翼翼，又期待」，並透露已追蹤對方，希望對方能回覆：「岀左一個post ，如果他是真的，我希望他會回覆 ，等待中」。

其實裕美曾透露年幼時父母關係不好，於恐慌中長大，更曾因爸爸關係討厭日本人，甚至唔想自己係日本人，長大後才識諗，想有生之年可以再見爸爸。