黎諾懿認懶惰　諗定退休食玩瞓

由黎諾懿主持的飲食節目《大牌筵席》今晚（19日）播出的一集中，諾懿前往電影《分手說愛你》和《分手100次》取景地之一、開業逾65年的灣仔老字號茶檔朝聖，該店的奶茶曾獲CNN選為「香港四大奶茶」之一，連諾懿歎過鎮店奶茶後也讚不絕口：「好香滑，佢啲茶真係好好飲。」

談到創辦茶檔的蘇氏家族2年前決定結業，本來任職司機的茶客彭生為保留這個好友敍腳點、兼一圓年輕時開餐廳夢想，遂以7位數頂手繼續營運，更因而遭老婆詐型。對此諾懿大表欣賞，並透露長大後為彌補童年遺憾，曾不擇手段兼大灑金錢去集齊某款玩具。問到將來退休大計，自認懶惰的諾懿笑謂：「我會瞓覺、瞓覺同去玩，我覺得退休仲做嘢好辛苦。」

至於丁子朗和游嘉欣則訪問了從事飲食業50年的大牌檔老闆，丁子朗還一早跟老闆落街市採購海鮮，及後再會合游嘉欣一起品嘗芝麻雞，游嘉欣大讚皮脆肉滑之餘，還指口感猶如煎堆夾雞肉，丁子朗說：「大牌檔唔一定喺條街先有風味，只要個靈魂、煮嘢食個心態喺度，邊度都係好食嘅大牌檔。」