任達華愛女任晴佳18歲成人禮　打扮火辣騷10頭身逆天比例

任達華與名模琦琦嘅愛女任晴佳（Ella），遺傳到父母嘅超強基因，自小已擁有逆天長腿，似足媽咪一樣身形高挑，氣質出眾，令佢未出道已獲不少品牌垂青，拍廣告甚至登上時裝騷舞台，前途無可限量！即將踏入18歲嘅佢，日前相約好友率先慶祝生日，佢喺社交網大晒一系列慶生靚相，並留言表示：「early birthday celebrations with my lovesss！（和我愛的人提早慶祝生日！）」

為咗迎接成人禮，Ella打扮亦成熟大膽得多，見佢以紅色吊帶連身短裙上陣，配埋長靴，大騷10頭身嘅黃金比例，而且佢一頭大波浪曲髮，加上烈燄紅唇，充滿超模氣場！而當晚佢更戴住媽媽品牌嘅天使造型頸鏈，相信Ella喺琦琦心目中同樣係小天使般嘅存在。