林心如打破婚變傳聞　霍建華發福戴婚戒成焦點

台灣女星林心如與老公霍建華早前被爆喺街頭吵大鑊，之後喺社交網刪走合照，一度被傳婚變。近日有網友晒出佢哋兩公婆私下聚會嘅合照，霍建華無名指戴住鑲鑽嘅婚戒，攬實林心如合照，十分恩愛，令到婚變傳聞不攻自破！

不過有網民將焦點放咗喺43歲嘅霍建華身上，因為着住深色牛仔褲搭配貼身上衣嘅佢，身材明顯發福，個肚腩凸咗出嚟，成個人望落有啲「油膩」，網友估佢可能係「幸福肥」呀！