視后佘詩曼（阿佘）於1997年參加香港小姐並奪得季軍，之後她於演藝圈發展，更成為TVB最輝煌時的花旦。她自2016年完約離開無綫（TVB），曾在2018年拍《延禧攻略》後便紅到發紫，成功打入內地市場。

去年有傳佘詩曼回巢拍劇，將接拍鍾澍佳監製的TVB新劇《新聞女郎》，據知將於2月底開拍。與老拍檔楊茜堯繼《宮心計》後再度合作，不過最近社交網流出演員陣容名單，除了阿佘外，男主角是馬國明，不過傳聞中的楊茜堯冇份，改為高海寧、何依婷、鄧智堅和前天堂鳥成員許俊豪等，都在演員名單之中。有指楊茜堯因為劇本不適合，所以推卻今次演出，她回覆東網說：「係有接觸過我，之後嘅細節就唔知，都係交畀經理人去傾，角色上嘅嘢如果啱一定有機會合作，就算今次合作唔到，下次都有機會。」而阿佘接受訪問時說：「繼《十月初五的月光》之後，再次同鍾澍佳導演（現監製）合作，睇完劇本之後，好鍾意，暫定三月開拍。因為劇本好好，所以同各演員必有火花！」

何依婷對於有機會與阿佘合作，她說：「係呀，之前都聽過監製講古仔同造型嘅嘢，但實質詳情都係未知，不過好開心可以同前輩合作，尤其係佘詩曼，因為真係從未諗過會有機會，呢個機會真係千載難逢，所以自己收到消息時，真係好開心好興奮，我會努力去做好個角色。」

馬國明說：「公司未正式通知我，希望係我啦！對上一次同阿佘合作，好似係5、6年前嘅《賭城群英會》，如果真係我拍就好開心，因為同阿佘拍戲係一件好享受嘅事，希望係我拍啦！」