曾比特最肥仔達180磅　唔敢再亂食望騷肌

歌手曾比特（Mike）今日（12日）以代言人身份出席「敏華」活動，首次任食肆代言的他自爆是「食肉獸」，吃3碗飯絕不成問題，問會此舉會否影響其減肥大計？他笑說：「我都有自制，但有時一不留神就會將食物放入口。（最肥有幾多磅？）應該係《全民造星》時期，當時有180磅，依家140磅，目標係想有肌肉，等有需要時可以除去上衣！（今年有機會開騷露肌肉？）可以露六手添！都係一個目標，我比較鍾意Live演出。」

談到去年於內地人氣急升，Mike表示暫未知甚麼時候再到內地，但間不中收到粉絲私訊表示想念他，問到是否賺達成買樓給家人的目標？他說：「十劃都未有一撇，但今次嘅收穫唔止係錢，係可以令我更加大開眼界。」至於農曆年將至，Mike透露剛巧家姐從台灣來港，故預料屆時將一起食飯度歲，問到是否送大利是給母親？他說：「一返香港已經畀咗。（6位數？）相信咁多個月家用總數都有嘅。」更指今年望於音樂上有突破，欲嘗試快歌及跳舞，更想挑戰曲詞編監位置。