陳法拉新片煞科　即飛返美國與家人過年

陳法拉在尖沙咀出席品牌活動，近期來港拍攝電影《贖夢》的她原來今早已經煞科，下午出席完活動後，晚上即飛返美國與家人過新年。講到拍通宵亦精神奕奕？在劇中戲中飾演精神病人的她笑說：「精神…病就真，終於可以抽離角色輕鬆啲，場場戲都好沉重。」至於再來港拍戲就要看劇本，希望演出角色不要重複。

法拉指有10多日沒有與女兒見面，相當掛念，已經買了賀年糖果準備與父母一起過年，她說：「都有教佢拜年𢭃利是。」她指女兒雖然習慣了陪她飛來飛去拍戲，但也希望在女兒返學前多陪伴。問到女兒可看過她的作品？她說：「冇呀，盡量唔畀佢接觸螢幕，因為好容易上癮，都係畀佢睇下書。」

講到楊紫瓊奪得金球獎「影后」，她說：「有恭喜佢，真係好難得，對於喺美國嘅華裔係好大嘅鼓舞，華裔喺荷里活好多時要做一啲行行企企嘅角色，講英文又要奇怪地有亞洲口音，佢可以做到女主角係好大嘅進步，證明亞洲面孔喺荷里活都可以收得，市場慢慢打開緊。」