新年變髮必睇　炎明熹曾比特招牌髮型是如何煉成的？

農曆新年就快到，唔少人都趕喺過年前剪頭髮，而近年因突出髮型令人認識嘅炎明熹（Gigi）及曾比特（Mike），近日就齊齊分享招牌髮型保養心得，等大家「變髮」前參考參考！

憑住標誌性眉上劉海令人留下深刻印象嘅Gigi，即使身處香港潮濕天氣，劉海依然堅挺兼整齊，Gigi日前就於內地節目大爆Set頭秘訣：「首先用風筒左右吹，吹完就將中間一部分（頭髮）弄起來，弄起來後就噴第一層噴髮膠。噴完之後就下1小層，再噴1層噴髮膠，噴完就再弄一層下來，就可以噴第3層髮膠，那就可以了。」原來劉海吹足3層髮膠，難怪風吹都唔亂！

至於因爆炸頭出晒位嘅Mike，就大呻要維持爆炸頭一啲都唔簡單，原來要瘋狂用護髮素，1個月就要用1支，而且每隔4個月就要電頭髮，每次都要電6個鐘，雖然望落頭髮勁濃密，但其實非常透風，唔會覺焗，夏天都唔會太熱，但有時都會紮起頭髮，避免有汗醃住。