Tiger＠MIRROR自嘲冇天分彈唔起　想學新嘢拒揀Job！

MIRROR成員邱傲然（Tiger）今日（20日）出席ViuTV新節目《演奏1 TAKE過》，身為主持的他表示在節目中試玩新樂器，問他是否一學即曉？他自嘲：「唔係，如果我咁有天分就彈起咗。（有冇諗過學新樂器？）都想學新嘢，但唔係樂器方面，上多啲唱歌同演戲堂。（想拍多啲劇？）我覺得有嘢就做，唔好揀飲擇食，唔好限死自己，總之有就做。」

講到新年，他坦言沒有收爐時間：「雖然有假放，但都有工作要做，所以冇得去旅行，但有得同家人食飯都好開心。（新年會唔會約MIRROR成員一齊聚會？）我都想，想大家一齊打邊爐同吹水，好難得一班人純粹玩，我試過約，但大家都冇乜反應，好難約齊腳。（約齊人出嚟係你個新年願望？）係，約齊人打邊爐同打牌。」另外，今日有指涉MIRROR紅館演唱會事故的藝能工程3名職員被落案控告串謀詐騙，Tiger指未有留意相關報道：「已進入司法程序，我唔方便批評，我哋擁抱過去，做好自己，其他嘢交番畀相關部門處理。」