戴祖儀趁新年上載搞笑新春圖被圈中好友輪流串

新正頭人人希望開開心心笑口常開，平日經常大放笑彈嘅藝人戴祖儀，亦趁大年初一加碼轟一轟大家，佢喺社交網上載相片留言：「見到此圖都係有緣人，祝各位有緣人新年快樂，兔年行好運，點讚行大運，戴金祖儀好運來，財源滾滾來，人人笑呵呵，呵呵呵呵呵呵呵呵呵呵呵呵。」

平時靚靚女女嘅佢放低偶包，將自己唔同表情嘅大頭相，貼喺一張金色背景嘅圖上面，淨係睇相都笑爆咀，多位有緣人亦毫不吝嗇紛紛點讚期望行大運，圈中有緣人蔣家旻就留言：「我真係笑口常開」、何浩文亦留言：「大佬呀新年流流」，洪永城即附和何浩文：「咪係囉，又未到盂蘭節」，亦有粉絲笑佢呢張係長輩圖，睇嚟戴金祖儀今次嘅人人笑呵呵行動相當成功喎。