Angelababy密實過節　趙麗穎鎖骨放蘋果獻技

早前久未在港公開露面嘅Angelababy，就為咗睇韓國女團BLACK PINK騷而返港，仲帶埋阿仔小海綿出巡，唔知依家身在香港定內地嘅佢，就選擇年初二（23日）先嚟晒賀年寫真，佢就喺屋企影賀年相，擺設簡單，僅拎住個獅頭同大家拜年，加上佢一身利是封造型，即時增添幾分過年氣氛。

至於尋日已經為大家晒膊頭嘅內地「千億點擊女王」趙麗穎，今次佢就轉玩「雜技」，將蘋果擺喺佢鎖骨上面，明明係賀年靚相，即刻加添幾分趣味，加上佢紅唇甜笑，新春暖意滿分！