任達華做泰國之友　去埋金佛寺見高僧

影帝任達華和米雪多年來一直致力推動泰國旅遊業。3年疫情過去終於開關，二人即獲泰國政府旅遊局，以及「泰國之友」頒發嘉許榮譽，以肯定他們的重大貢獻。任達華與米雪過年前飛抵當地親身領獎，獲當地電視台廣泛報道，二人所到之處萬人空巷，前者對粉絲要求合照來者不拒，當中甚至包括印度藉影迷亦認出他。

談到今次泰國行，任達華開心表示：「有順道去拜吓四面佛，再去金佛寺見高僧。能夠再喺唐人街見返泰國市民，個個笑容滿面，好似一家人咁，感覺好溫暖。」而結束3日行程後，任達華已轉飛他處，會合妻女渡新歲：「呢排未開工，梗係爭取時間過吓家庭樂啦，想多啲陪吓個女嘛。」

另外，農曆年前任達華獲邀到柴灣一間小學，與小學生齊齊寫揮春。他笑說：「因為學校嘅老師識我，我就去同啲小朋友交流吓，見到佢哋覺得香港充滿希望及生氣。其實呢排我都有畫水墨畫同畫蘭花，諗緊今年內會推出新書，主題圍繞現代藝術。」