曹永廉北上觀摩直播帶貨 自認普通話水皮驚搞唔掂

2023年01月24日 23:01
東網電視
更多新聞短片
藝人曹永廉有份拍攝古裝賀歲劇《黃金萬両》,跟薛家燕和麥美恩等合作放笑彈,阿廉表示有家燕姐在場就算拍得幾辛苦都一定開心:「佢幾攰都會同你講笑,又會萬歲,時間上控制得好好,係一個好領隊。」不過最辛苦是拍攝撞正炎夏,全身戲服連底褲都被汗水濕透:「最難忘係基本上每個演員都中過暑,拍得好吃力,有一場戲講我哋幾兄弟舞獅,當時有40度,仲要笠住個獅頭舞動,真係勁辛苦。大家由第一日開工,到拍咗兩、三星期後,身形都瘦咗成個碼。」
另外,阿廉透露剛由內地返港,故春節會留港跟家人團聚,談到今次內地之行,他坦言計劃不似預期:「原本有廣告,但因為疫情令部分工作要取消或改期,不過今次返去內地都有得着,對內地影視圈發展更加了解,識多咗人,見識多咗。有人帶我去咗好多直播帶貨公司參觀,我知呢方面好興旺,好多人搵我做直播帶貨,但我普通話唔叻,所以未必適合,我都係想做番演藝工作先。」問到兔年目標,他不諱言想多賺錢:「今次了解咗內地情形,可能之後會有啲鋪排,將來內地香港兩邊走。」