炎明熹演《愛.回家》感不可思議 向劉丹集郵為首要目標

2023年01月25日 19:01
東網電視
更多新聞短片
「人氣王」炎明熹(Gigi)明晚年初五將客串為無綫處境劇《愛.回家之開心速遞》演出。原來Gigi屬《愛回家》「鐵粉」,小學已經開始棒場,對於獲邀拍攝劇集坦言大感興奮,她說:「我有追開《愛回家》,時間許可,我會準時八點鐘喺電視面前觀看,佢哋嘅內容令我睇完之後好開心,每集又會帶出一啲信息,我覺得好生活化。呢個處境劇我係由細睇到大,小學時係睇《八時入席》。」
Gigi表示能與劇中角色真正合作,感覺榮幸又夢幻,直情是不可思議,最尊敬的角色是劉丹(丹爺),拍攝時並爭取機會「集郵」與對方合照,她說:「我知佢做咗好耐《愛回家》,好開心可以加入呢個大家庭,因為我見到佢哋好似屋企人咁相處,佢哋會互相叫對方做阿爸、家姐或者阿妹,佢哋亦都好照顧我。」 變成粉絲的Gigi大讚劇中道具相當像真:「我一直以為「新威龍廣場」係一個真嘅廣場,然後Key個名落去,後來先知道原來係一個廠景,係特登搭出嚟,覺得好神奇,同埋入面啲產品同店名都好得意,同嗰個𨋢真係好真。」
Gigi希望日後能有機會多拍劇,因為她很喜歡和公司的幕後工作人員相處,皆因很有愛,她說:「我一直好想拍劇,覺得好有趣,好鍾意同工作人員相處,拍劇時經常對到大家,佢哋真係非常之好,好似屋企人咁,希望儲多啲經驗同能力後再拍劇。」喜歡挑戰自己的Gigi笑言沒有特別想做的角色,因為甚麼角色也想做。
充滿童真的Gigi指拍攝當日遇到兩名可愛的小朋友,並高興對方提出合照要求,她當時還拿出兩粒朱古力氹小朋友開心,Gigi興奮地說:「嗰日誤打誤撞帶咗兩粒朱古力,其實原本我係想試吓個味,因為冇食過,最後我就一人一粒畀佢哋食,啱啱好,Yeah!」