Baby黃曉明驚傳復合　情侶裝造型掀話題

內地女星Angelababy（楊穎）與黃曉明離婚後，生活一舉一動都受到網民關注。恰逢過年，Angelababy於社交網大晒靚相，見佢身穿紅色針織毛衣搭配七分裙，腰間盡現小蠻腰，睇落青春可人。佢喺貼文寫到：「過年好，紅彤彤的小兔，來給大家拜年啦。」

而黃曉明日前都有喺社交網拍片表演「用鼻畫兔仔」，見佢個樣睇落後生咗好多，愈嚟愈靚仔，網民仲大讚佢「超級回春」。之後佢又晒出喜慶相，見佢拎住紅燈籠兼揮春，露出燦爛笑容，又向大家送上祝福：「一年又一年，感恩大家的陪伴。新的一年我們繼續一起飛猛進，往前沖吧！」不過有眼利網民發現Angelababy以及黃曉明身上嘅紅色毛衣，疑似係情侶款，因而傳出二人「復合」，但亦有人覺得新年着紅色衫好平常，叫大家唔好諗多咗呀！