汪小菲又被爆偷食　疑背張穎穎夜店啜女相曝光！

台灣「資深狗仔」葛斯齊去年因連環爆料女星徐熙媛（大S）前夫汪小菲當年婚內出軌嘅親密照，搞到佢一夜間喺兩岸三地聲名大噪，估唔到依家汪小菲同女友張穎穎鬧分手之際，葛斯齊尋晚（27日）又嚟料，於直播時出兩張汪小菲同女生咀錫嘅相，並強調啲相係佢同張穎穎仍然拍拖時被拍到。

相中見疑似汪小菲喺夜店同女生親近，一張係佢同多位衣着性感嘅女士坐埋一齊，另一張更係佢同一位女士錫嘴仔，加上葛斯齊指相中女生唔係張穎穎，即令到「#葛斯齊再曝汪小菲與女生親吻照#」話題登上熱搜，不過亦有網友質疑相中人係咪汪小菲，及相中二人接吻有借位之嫌等。目前汪小菲及張穎穎均未就爆料一事作回應。

今日（28日）葛斯齊更將佢喺Live中展示過嘅原圖放上社交網，及2017年大S佗第3胎時同汪小菲翹手出街嘅相，順勢推翻早前汪小菲媽媽張蘭質疑大S曾出軌之說，並留言：「PS. 張穎穎，除了懷孕照，這些照片都是你『任期內』所發生的事啊！快醒醒吧！不是都說摩羯座女生最理性、聰明、識大體嗎⋯⋯哎」

另外，汪小菲母親張蘭稱除夕晚，大S的微信取消封鎖她，但突然發了一張4口合照片後並又再度拉黑她，張蘭表示：「大年三十的你說噁心不噁心人，我孫子、我孫女，他們家4口子合影，給我們發過來又給拉黑，什麼人幹這種事，你說是人嗎？」而網上流傳了這張合照，但經網友發現是一張合成照。