吳浩康狂數老婆黑面爆粗 密謀再造人維繫感情

2023年01月29日 23:01
東網電視
更多新聞短片
藝人吳浩康(Deep)被「格鬥女神」郭思琳收服,去年結婚生B一Take過,首年派雙封利是的他日前受訪時表示:「派雙利是係開心事。(阿仔大豐收?)我會將佢啲利是錢儲起,畀佢知爸爸唔會攞佢啲嘢。」又讚囝囝孝順,免父母辛勞自動戒夜奶,反而老婆最令他頭痛:「原來要老婆情緒穩定,唔好連續要佢做3樣嘢,否則佢覺得你冇份參與,洗奶樽都可以呯嘭咁大聲。」但他卻樂在其中,笑言有「被虐狂」:「懷疑我好鍾意老婆黑面,佢一嬲我就讚『你黑口黑面好靚,講埋粗口仲冇得頂添,掟嘢時嘅肢體都好索』,可惜佢愈氹愈嬲。」不過,他強調老婆動口不動手,他說:「佢抽就唔夠我抽,打我體力上會攰,但黑面可以馬拉松式3個月。」
他自稱挑戰老婆容忍極限是用心良苦,因將來再生BB需要更強EQ,問是否準備再生?他直認:「發覺佢愈嚟愈唔鍾意我,所以有陰謀要多個嚟綁住佢個心,但太太話怕咗懷孕。(會唔會強行造人?)都好喎,趁新年悶悶哋,今晚搵老婆先。」而郭思琳對於被爆黑面,受訪時稱因24小時湊BB平均個半鐘醒一次,令她表情管理上難受控,又指是Deep誤會她:「諗多咗,佢幫多啲手,我休息多啲就會成日笑口噬噬對住佢!(老公想生多個?)順其自然,暫時真係搞唔掂,到依家都仲未回復番之前嘅狀態。」
沈震軒百萬開健身室
而Deep的同門沈震軒表示踏入人生新階段,投資逾7位數開高檔健身室,且透露將有大驚喜給拍拖5年的女友陳欣妍。至於艾妮則喜獲公司重本投資,3月將到日本為HIFI碟錄音。
場地提供:PHENOMENON WINE DINE