「聲夢小花」姚焯菲（Chantel）最近到新西蘭升學，但其一舉一動依然備受香港「小菲象」關注，近日佢終於正式開學，更令其新學校曝光，原來係著名嘅奧克蘭拔萃女子學校（Diocesan School for Girls），該校有過百年歷史，係數一數二嘅寄宿學校，據2020年資料顯示，中學課程每年學費為每年44,170紐西蘭元（約224,000港元），寄宿公寓費用為每年16,590紐西蘭元（約84,300港元），即Chantel一年留學加住宿費用超過30萬港元！

學校於社交網上載新相，見Chantel都有入鏡，以小背心配短裙上陣嘅佢企正中間位置，似乎已經融入新環境，而且頗受新同學歡迎，加上佢全程笑容滿面，心情非常好，學校專頁亦透露原來昨晚（29日）係第一晚嘅迎新活動：「很棒的第一晚！很高興今天見到大家，看到大家聚在一起參加團隊建設活動！迫不及待地等待著美好的一年！」