賀歲票房險包尾　梁朝偉奇招出擊拖王一博落水

影帝梁朝偉與內地藝人王一博主演電影《無名》，於內地賀歲檔上映，一開始新片預售票房稱霸，可惜後勁不繼之後成績唔多理想，喺七套賀歲片中倒數第二，差少少就包尾。有見及此，《無》劇組就借社交網發布花絮片，其中一條片場花絮更係衝擊350萬觀看次數，令新片都有番啲水花！

片中梁朝偉緩步行入片場，坐喺度等埋位嘅王一博同內地演員王傳君就即刻對前輩打招呼，但三人講咗句「Hello」就完結對話，偉仔一直尷尬咁笑住企喺原地，唔知講咩好嘅佢「社恐」發作，又深呼吸、又兩頭張望，用眼神急急搵人求救。一直去到導演幫手緩和氣氛，向偉仔介紹兩位演員叫「阿呆、阿瓜」 偉仔先笑番，不過都依舊一副尷尬樣，三人對視36秒都冇偈傾，搞到網友都話睇到笑出聲。