林夏薇老公與佐藤健合照　化身滿島光重現《First Love》名場面

日劇《First Love》感動了不少人，兩大主角佐藤健和滿島光更勾起大家初戀回憶，令人心動，當中北海道雪景更是名場面，人人都幻想自己是佐藤健和滿島光。

心動不如行動，林夏薇老公莫贊生就有這個福分感受「First Love」，不過...莫生並非與滿島光相依相偎，直情化身滿島光，與佐藤健攬埋一舊呀！

原來莫生近日飛日本傾生意，在共同朋友下認識日本男神佐藤健，共赴同一聚會，莫生當然把握機會與對方合照，只見莫生似小鳥伊人般從後攬住佐藤健，畫面所見的只有愛，登時重演《First Love》雪地經典一幕。

莫生自肥又點少得薇薇？期間打了視像電話給老婆，因為薇薇太興奮，只是Say了一個Hi，忘記截圖就收線，但足以令她開心到爆，薇薇接受東網訪問說：「因本身有睇佢套《First Love》，佢真係好好戲，冇諗過可以同真人對話到，已約定下次一齊食飯！」薇薇還立即把老公與佐藤健的合照，上載社交網開心Share，不過有網民發現佐藤健突然大細眼，好似有點累！原來，無綫高層樂易玲亦有出席聚會，她亦有上載與佐藤健的合照。