洪永城日防夜防「家賊」難防　當場斷正

藝人洪永城（Tony）同太太梁諾妍（Inez）所生嘅一歲囡囡Amber生得精靈可愛，更經常為屋企增添歡樂，啱啱學識行嘅佢更被媽媽Inez形容為捉都捉唔住，而Amber今次又有新搞作，Tony喺社交網上戴片段後留言：「家賊！今日屋企有賊仔，附上犯罪疑犯片段，如發現此人請立刻舉報。」片段一開始就見Amber企喺Tony嘅背囊旁邊，佢對手仔正係伸入背囊，然後好熟練咁將背囊入面嘅一盒飲品攞出嚟，Tony就即刻扮呼喝囡囡：「賊仔！做咩Amber？做咩偷我嘢呀？」

被撞破好事嘅Amber只係望住Tony回應一句BB話，然後就逃之夭夭，家姐（Tony愛犬）仲幫手截住Tony，非常搞笑。圈中好友林溥來就留言：「佢擺明喺你面前攞，唔算偷喎，係明搶。」有網民就留言幫手解畫：「家姐叫你唔好鬧妹妹」、「係咪放入雪櫃吖？幫你雪凍先」，亦有網民留言讚小賊仔可愛：「她的態度係睬你到傻」、「咁可愛家賊我都係第一次見」、「最好笑係Amber 即刻走入房！」