陳山聰劉佩玥連場肉搏　搞到濕晒仲坐爛梳化

陳山聦、劉佩玥（Moon)、張振朗、劉穎鏇、丁子朗、郭柏妍在將軍澳電視城為新劇《奪命提示》進行拜神儀式。監製爆料指山聰與Moon劇中有不少「愛情動作戲」，昨晚一場更拍到坐凹梳化，相當激烈。

山聰笑說：「場戲由門口搞到梳化，又擲嚟擲去，佢仲坐上我大髀，拍到好攰，出晒汗成身濕晒，Moon直情要去廁所冷靜一下回氣，之後仲有幾場肉搏戲仲激。」問到坐爛梳化的Moon可要減磅？她說：「新年同劉穎鏇約定食少啲嘢，其實唔係磅數嘅問題，係我體形骨架嘅問題，最緊要埋身搏擊戲效果出嚟好睇。」講到張振朗開工受傷，山聰笑說：「學佢話齋，應咗之後就紅運當頭，睇好佢今年攞埋視帝。」