加盟英皇發展演藝事業的沈震軒踏入兔年將迎接另一身份，投資7位數的健身室將3月中至尾開張，首嘗做老闆滋味。他稱為開健身至幾乎傾盡身家：「雖然銅鑼灣羅素街啲租真係好貴，但好在業主肯收疫情價。」他笑言最正是健身室樓下正是老闆楊受成的鐘錶行：「我得閒可以落去搲吓老闆。」而他已有一套長遠大計，希望業務擴展至健康餐廳及美容等：「我同拍檔好有信心，估計開張9個月就回到本。」

雖然女友陳欣妍未有投資，但沈震軒已直呼對方是老闆娘：「佢都會幫我做招牌，我哋兩個畀人感覺都係鍾意做運動。」講到結婚，他稱已有計劃：「盡量喺我做到嘅情況下畀驚喜佢囉，好多嘢要準備，但我都安排咗，都係呢1年發生，不過我好低調。（結咗婚先公布？）到時你咪知囉，5月我就40歲，係一個打拚嘅年紀，我覺得係個新開始。」