全民造星V︱Lokman偏心北美仔仔　肥仔難忘「翻版阿Dee」

《全民造星V》94強誕生，其中84名入圍參賽者今日（10日）現身《全民造星V》優先場，當中年紀最細17歲的Owen是全職Busker，最年長是35歲來自馬來西亞的創作歌手Adam。參賽者中有現職大狀、中醫、工程師和審計師，又不乏演員、歌手、模特兒、KOL和學生。過往4屆《全民造星》都是由花姐做監製，今年監製一職突然改為許敬麟。不過花姐今日都有低調現身做旁觀者，但許敬麟不受訪。

而MIRROR的Lokman和ERROR的肥仔也有出席，Anson Kong則因病缺席。早前Lokman和AK赴加拿大摔角，Lokman坦言偏心北美參賽者，他讚北美的仔仔純品但反應慢，表演又好投入，反差好大，睇好Lyman和Chit。

肥仔和阿Dee早前赴馬來西亞選角，肥仔亦偏心馬國仔仔，讚質素勁，對於今屆不少肥仔參加，他笑稱一定撐肥仔，若他們被Foul想組男子隊Boy Band。他又稱對其中任大狀的「翻版阿Dee」Aaron最有印象，並拿出Dee與Aaron合照，神似度極高，又講笑說：「香港唔使有兩個何啟華，我梗係要舊嗰個。」他自爆在馬國時扮姜濤氹人參加，但無人理，十分好笑。

提到AK病倒，Lokman表示之前與AK工作時冷病，要去看醫生。由於明天MIRROR會全體出活動，問會否擔心又不齊人時，肥仔就講笑《造星V》有幾個翻版AK和AL，可做替身。問姜濤狀況如何？Lokman就表示姜濤狀況不錯，亦瘦了不少。

今屆《造星V》有來自馬來西亞和北美代表，其中45號馬來西亞代表Adam及9號北美的Lyman被挑選有Solo表演，明顯被睇高一線。Adam身型屬肥仔型，笑言香港太多好吃小食，又食宵夜，來港3個月不斷增磅，打算去做健身修身，順便見識香港的健身中心。他覺得自己才華戰勝一切，自信稱「跳舞無肥仔（梁業）咁好，但其他方面好佢啲啲。」而貌似吳尊的Lyman在香港長大，於美國讀書及做Dancer超過10年，善長拉丁舞又演過舞台劇，參賽希望將英美的經驗帶來香港發展。

而63號盧思睿（Bryan），是自由工作者，曾拍廣告，因與COLLAR的Marf傳過緋聞而為人認識，被網民踢爆男方約炮往事，問到是否認識Marf時，他煞有介事，即時落閘表示冇回應：「有睇過全民造星都認識。（你哋傳過緋聞？）感情事唔回講，想專注比賽。（見到Marf會唔會尷尬？）呢個係導向性問題，唔怕尷尬。」表示自己專長唱歌，希望在不同平台表演，享受表演和比賽，較少跳舞，知道不少參塞者跳舞好勁，自己會加緊操練。

36號阿O之前使出震股絕技震攝導師陳蕾，對方直言被他電到。阿O稱是初選時跳的舞步，直認想電陳蕾，及希望表演令人「起雞皮」感覺。

79號Kakit現場示範折骨舞，技驚四座，他坦言受師兄「折骨BEN」影響而自學，但覺得未能跟對方比較，不過相信有信心未必會羸，但冇信心一定會輸，故一定要抱有信心。

98號Aaron因貌似Dee而成為焦點，他稱朋友都都覺得他貌似Dee，笑言當見到真Dee時呆一呆：「嗰刻有啲震撼，好似望住塊鏡咁，大家呆咗，睇相同真人對望差太遠，真人仲似。」本身是大狀的他，因為鍾意唱歌而參賽，從事大狀工作3年，覺得工作壓力大，認為參加比賽是另類壓力，暫未有明確定位將來入行做甚麼，可能主持會適合，或者從比賽中再發掘更多可能。他稱不會放棄大狀本行，相信工作具彈性，會兼顧到：「好多娛圈中人都有正職，好似許廷鏗都係牙醫，（客知唔知你參賽？）冇特別講，會工私分開，（擔心影響你專業？）唔會，一樣保持專業。」將來就算入行也不會放棄本職。

74號阿生、87號Meow及42Moley均是《造星》的重讀生，阿生與Meow參加過《造星II》，而Moley在第一屆中打入20強。

Moley表示自己一直無放棄過追夢，《造星III》時做助導，所以沒有參加，之後一屆只選女，所以等到今屆再參加，他又指第一屆參賽時予人印象不太好， 所以希望藉今次被人看到自己已大個仔。提到與第一屆MIRROR成員時有傾偈及飯局，問到今屆是否有信心？他表示有信心，亦希望能愈打愈入，可能做過幕後，覺得團隊緊要過名次。而阿生則表示很喜歡表演，希望作為事業，這兩年也有學跳舞裝備自己，而Meow則表示一直沒有放棄，只是去年是女仔，所以今年才再參加。