中年好聲音︱曹敏寶愛的宣言 龍婷突破自己
2023年02月11日 17:56
東網電視
更多新聞短片
![](/hk/bkn/cnt/entertainment/20230211/photo/bkn-20230211175612397-0211_00862_001_01p.jpg?20230211180431)
無綫綜藝唱歌真人騷《中年好聲音》一班參賽者出席商場舉行的「『聲』Sing戀Love Love」活動,近日被指撇甩鄧麗君影子的「小龍女」龍婷,表示會不斷突破自己,隨住比賽轉入直路,心情既緊張刺激又期待,認為要緊張才能投入比賽。
獲老公送上鮮花的曹敏寶,趁機發表愛的宣言:「沒有你,我甚麼都不是。」認真冧到爆,她透露老公今年相當醒目,已預早訂定餐廳慶祝情人節:「以往要我暗示,今年真係好驚喜,幾日前叫定我14號唔好約人,到時二人世界,呢排大家冇咩時間相處,我比賽好大壓力,又有仔女,加上老公鼻鼾好勁,所以分房瞓,希望到時佢畀到驚喜氹吓我啦!」
談到與一眾參賽者感情要好,敏寶笑指現時每晚也有飯局:「大家好似一家人咁,去錄音室時連參賽歌都唱俾大家聽,睇吓有咩可以改善,唔驚被出賣。(即係比賽名次都唔緊要?)都尊重比賽,係過程令我哋成長,所以邊個贏都開心。(吳大強之前咁高分,係咪勁敵之一?)唔係,佢係我哋最尊敬嘅長輩,70歲有咁樣嘅表現,好震撼到大家嘅眼睛, 係我嘅五強心水名單。」龍婷則周吉佩及吳大強為心水名單。
周吉佩(吉吉)直言現時心情比起以前做歌手時更緊張,加上拍攝時間緊密,平時要返工及照顧小朋友,結果睡眠質素下降,每晚僅睡2、3小時。他更回憶以往組樂隊時,與兄弟不歡而散往事,更有過兩次情緒病發經驗:「第一次大約2、3年前,喺公司突然有種無助感,望住個窗好想跳落去,第二次係喺自己張床瞓瞓吓覺,覺得有個人撳住我個心口唞唔到氣,不過依家都叫做冇事。」談到龍婷睇好他入3甲,吉吉亦大讚對方有實力,更指曾是她手下敗將:「但嗰次之後我哋變咗好朋友,所以好想之後有機會合唱,佢嘅粉絲都好好,讚偶像之餘仲會讚埋我。」