瘋傳宋茜嫁《琅琊榜》王凱　網友驚訝：原來識㗎

曾任「金鹰女神」出盡風頭嘅內地女星宋茜，貴為影視界女神，當年又係韓國女團f(x)出身，所有條件都高人一等，不過感情生活就未見有起色，點知近日網上瘋傳宋茜下嫁《琅琊榜》男神王凱！兩人看似大纜都扯唔埋，但有網友發現王凱情人節告白朗誦嘅片頭日期，正正就係宋茜生日日期，隨即有人爆料王凱即將迎娶圈內女友，並暗示對方就係宋茜，「#王凱 宋茜#」話題即登上熱搜，仲吸引咗成1.1億人睇。

不過最令網友搲頭嘅係二人從未合作，近期「同框」嘅都只係齊齊上咗個演員排名榜，兩人到底係咪認識對方都成問題。之後再有網友就指王凱嗰段片頭，只係剪片模版自帶嘅水印，似乎唔係啲咩暗示，而王凱同宋茜工作室亦迅速發出闢謠聲明。王凱方否認同宋茜戀情：「不造謠，不信謠，不傳謠。」而宋茜工作室就發布嚴正聲明：「網絡上出現的相關內容均為造謠信息，強烈譴責造謠的惡意誹謗者。」