陳妍希爆陳曉婚前勁浪漫超溫馨　婚後生日唔送禮

台灣女星陳妍希同內地男神老公陳曉平時低調家庭事，合照都唔係成日upload，但隨住婚變傳聞愈傳愈烈，陳妍希最近於戀愛綜藝《半熟戀人2》入面就一反常態狂講夫妻事，今次佢就大爆陳曉婚前婚後兩個樣，由原來成日搞浪漫溫馨嘅日子，變到依家連佢生日都冇禮物收！

陳妍希就自爆陳曉曾經趁探班，大搞「玫瑰花床」等，聽到其他藝人滿眼羨慕：「陳曉結婚以前真的很浪漫，比如我過生日他都會偷偷跑來劇組，到我房間裏鋪玫瑰花瓣甚麼的，還準備氣球和蛋糕給我過生日。但結婚後我就再也沒收到過任何的生日禮物了，不過家裏的經濟大權在我手上，他可能覺得我要甚麼可以自己去買。」雖然陳妍希話陳曉婚前浪漫、婚後變樣，不過當大家聽到話陳曉將錢都交晒畀佢，瞬間就明白二人獨有嘅婚姻維繫方式喇，網友仲大讚陳曉夠信任老婆，係變相寵妻。