洪金寶與太太貼地食大牌檔　高麗虹氣質非凡風采依然

71歲嘅洪金寶雖然貴為影壇「大哥大」，但私下相當親民冇架子，仲不時被網友野生捕獲去街市買餸，而日前又有網友喺大牌檔偶遇洪金寶同太太高麗虹，夠晒貼地！戴上帽子嘅洪金寶身穿格仔恤衫打扮樸素，隨意將拐杖掛喺大髀上，而片中身穿藍色恤衫嘅高麗虹只見到側面，但已57歲嘅佢，望落Keep得唔錯，五官立體，皮膚緊緻，氣質非凡，網民都大讚貴為前港姐冠軍嘅佢風采唔輸當年呀！