森美飛完再飛日本　同老婆報復式去旅行

藝人森美今日（18日）現身兒童飛龍大使選舉開幕典禮，他透露其女兒於2018年的飛龍大使：「佢當年仲係小學五年級，去咗日本兩星期交流，住喺一個日本家庭，除咗了解到當地文化外，視野亦拓闊咗。（當年有冇好唔捨得阿女？）算係第一次離開我哋咁耐，但有人帶住都放心，而且佢去日本嘅時候，我都喺日本，但唔同地方，感覺上近啲。」

另外，森美早前一家人到了日本旅行，他透露下星期再去日本：「今次同太太兩個，報復式旅行，因為太太鍾意滑雪，所以今次都係滑雪，仔女大咗啲唔使咁緊張，可以放鬆心情。」至於工作方面，他表示會為無綫主持一個關於法律的遊戲節目：「會同6個讀法律嘅女藝人一齊玩，原來有咁多個讀法律，咁叻，我扮專家都唔得，我做師爺啦！」他指現時工作壓力減少，會開始做自己喜歡的工作，打算會跟朋友Band：「會做歌，但只係為興趣，唔係為創一番音樂事業，希望可以表演吓，但唔係做大騷。」