袁富華同圈外女友結束愛情長跑　秘密完婚讀誓詞眼濕濕

藝人袁富華與圈外女友於本月18日結束愛情長跑，於一眾親友見證下，正式註冊結為夫婦。新郎哥受訪時難掩興奮之情，並透露：「最難忘係依家身份改變咗，終於有人叫我老公喇。由於雙方父母不在，我哋係由家姐及哥哥做證婚人嘅，都係簡單擺咗3圍，冇請任何朋友及同事，簡簡單單就完婚，翌日我仲繼續去開工添。」

見慣世面的袁富華平日背對白易如反掌，但當念誓詞卻緊張起來：「全程我都好小心咁讀，讀完真係眼濕濕。（幾時先度蜜月？）搞埋手頭上濕星嘅工作，預算下星期出發去北海道。返嚟就會分批約番啲朋友食飯，到時大家鍾意點我都奉陪。」

原來二人拍拖多年，一直未有同居，袁富華為築愛巢，已由郊區搬返市區生活：「大家都習慣咗有好多嘅私人空間，依家就要互相遷就，講乜都要喺『黃金十秒』收吓啲脾氣先。（唔慣？）頭幾日都會，真係有鬧交，好彩好快冇事，明白依家要開始兩個人嘅共同生活，犧牲及包容都係愛嘅表現。」