楊冪4歲童星照出土　做公主奠定「古裝女王」之路

內地花旦楊冪憑古裝劇打響名堂獲封「古裝女王」，其實童星出身嘅佢自小已開始拍古裝，近日有網民翻出陳年出土照，係佢於1990年拍攝《唐明皇》時嘅花絮照，當時只得4歲嘅佢被選中飾演幼年咸宜公主，見佢眼大大、五官精緻，與現時樣子變化不大，認真由細靚到大。最搞笑係其中一張相，見佢竟然甩咗大門牙，但都完全唔怕醜，繼續對住鏡頭開懷大笑，真摰可愛笑容令人動容，即獲網民大讚：「從小到大都沒變樣」、「換門牙依然可愛」！