Twins穿越仙境玩SheShe　勾《齊天大聖》經典回憶

組合Twins嘅蔡卓妍（阿Sa）及鍾欣潼（阿嬌），近日再度合體擔任手遊代言人，齊齊拍住上搵真銀。日前手遊廣告面世，見佢哋大玩穿越，阿Sa由現代穿越到古代仙俠世界，搖身一變就換上一身白衣仙氣Look，仲遇上另一位仙女阿嬌，2人一見如故，仲大玩She She情節，喺老樹下盪鞦韆，相擁兼深情對望，仲許下誓願要不離不棄，畫面唯美。而佢哋今次以仙氣古裝扮相同框，令唔少粉絲都聯想起當年佢哋喺《齊天大聖孫悟空》中扮演嘅一對姊妹仙女紫蘭仙子及紫薇仙子，經典回憶即時返晒嚟！