黃聖依老公親自帶團　7500呎豪宅全面睇

「星女郎」內地女星黃聖依早年亮相真人騷節目《婆婆和媽媽2》及《媽媽是超人3》時，曾曝光其豪宅家居內部，當時已成為一時熱話，近日老公楊子更索性邀請網紅到家中參觀，實行豪宅全面睇！網紅一踏入家門已被震懾，空間廣闊之外更有一對超巨型華麗嘅花式鐵門，似足大型酒店門口一樣，入到屋內更見裝修金碧輝煌，樓高3層，十足博物館一樣。

入到客廳，空間大到好似籃球場一樣，不但擺有桌球枱，上放更有巨型吊燈，地上就有超長紅地氈，家具則以中式木製品為主，旁邊擺放大量花瓶、玉石、玉像等古董，其中仲有的巨型木雕金龍魚擺設，要用兩張長木枱先支撐得起，定必價值連城。而去到飯廳位置，中間放有至少坐20人嘅圓形飯枱，再加上巨型水晶燈，氣派十足，不過楊子就坦言飯枱太細：「其實這個桌子只能到第三代」，根本唔夠佢哋家族四代同堂坐，認真誇張。另外，家中有專為小朋友而設嘅遊戲室，同時每間房嘅室內空間都大得離地，據知全屋7500呎大如宮殿，如果冇楊子全程帶路，一定會迷路！