謝安琪公審張繼聰借自己做藉口買車：唔止一次

歌手謝安琪（Kay）出席公開活動，談到老公張繼聰於社交網自爆於12小時內連環壞車，結果兩度Call拖車協助，對此Kay笑說：「玩古董車成日都有呢啲事發生，但2次拖車真係第一次，所以我先留言講笑話不如買架拖車，咁可以幫佢拖去相熟車房，因為拖車都好貴，所以佢冇講搞咗幾錢。」

提到阿聰以有趣方式來演繹慘況，Kay大讚老公心理質素強大，即使遇上大壓力，睡覺仍能笑出聲：「知道條片帶畀好多人歡樂，滿滿正能量，唔係嘅話我都鬧咗佢啦。（你都好好脾氣！）我隻眼開眼隻閉，因為佢除咗運動同湊小朋友之外都冇乜其他嗜好，但都係時候要佢自己數吓有幾多車，我見都起碼6、7架，今次壞嘅分別係40幾年嘅私家車同70幾年嘅電單車。」

以往阿聰曾送電單車給Kay作為生日禮物，問到生日將至的她想收到甚麼禮物？Kay表示：「唔好再送車畀我，因為佢已經唔止一次，次次都話係買畀我，但其實我係最少揸車嘅一個。（到時點慶祝？）都係同父母喺屋企食飯，有咗兩個小朋友之後都唔會有二人世界，所以都唔會出埠。」