Ian揚言上台表演換衫 AK為「封咪」解畫
2023年03月10日 16:34
東網電視
更多新聞短片
![](/hk/bkn/cnt/entertainment/20230310/photo/bkn-20230310163448481-0310_00862_001_01p.jpg?20230310174251)
男圑MIRROR江𤒹生(AK)、陳卓賢(Ian)與陳蕾現身《拉闊音樂會》記者會,宣布5月14日合體開騷,現場逾5百粉絲撐場,聲勢浩大!
台上司儀問到3人在音樂會上有甚麼新嘗試?Ian稱想試試不唱歌,只表演棟篤企,但粉絲大叫不收貨,他改口表示可以在台上表演換衫,但要有簾遮掩。至於被指封咪不出獨唱歌的AK笑言:「我尊重拉闊,所以之前封一封,開騷就開咪!」又指今次兩男一女組合是個「嬲」字,表現風騷不停講笑。而陳蕾謂可挑戰跳舞,並即場騷了兩下舞技。另外,他們要即場於對方的歌曲設計舞台晒畫技,AK的畫功明顯最不濟,當Ian收到對方的大作時即嘴扁,AK揚言要在對方家中見到這幅畫,Ian斷然拒絕:「冇可能。」場面搞笑!
受訪時,講到三人首度在舞台合作,他們均大表興奮及期待,陳蕾認為兩人有些歌曲很適合自己演繹,Ian坦言:「我本身個風格同佢哋兩個唔係太接近 ,但都係好事,可以畀唔同面向觀眾睇。」問到陳蕾是否真的會跳舞?她反問AK說:「可不可以教我跳《虎道門》,我嘅第一次會唔會畀咗你哋。」而她繼與張天賦及洪嘉豪合作後,今次換上AK和Ian,她難掩興奮說:「好開心,太好喇!」
提到AK早前在粉絲對話群組中表示封咪不再推出個人歌曲,他稱只是誤會:「我最近同Ian拍緊劇集《冰上花火》,因為檔期排得太密,又要通頂,本來計劃錄新歌都完全錄唔到,希望完咗個劇再重新投入音樂事業,因為之前試過又拍劇又出歌,反而啲歌仲做唔好,所以同公司講希望專心拍晒劇再做歌,希望拉闊前會有第一首歌。」Ian透露兩人剛收工,記者會後再繼續為劇集開工:「進度唔錯,已經拍完3分2。(你之前病咗仲開工,會唔會太辛苦?)有一齊參與嘅工作人員知道我病咗好開心,佢哋話Ian終於有得休息真係好,都休息咗幾日。」AK笑言期待下一次病,Ian說:「咁又唔好,最緊要身體健康,都唔想因為自己唔舒服而影響拍攝進度,病嘅時候都想快啲歸隊。」AK解釋因為劇組已訂了拍攝場地,未能改期,故Ian病了也要頂硬上拍攝。問到會否跟公司反映,不要將工作排得太密?Ian說:「都好矛盾,因為自己好鍾意工作,好享受密密麻麻嘅工作檔期,但都需要適應休息,拍劇時我都有繼續做歌,如果一日唔止24小時,40個鐘我就開心。」Ak自言:「我就係計唔掂條數,所以我拍好劇先做歌。」問到Ian會唔會效法對方封咪?Ian揚言:「我會同時間一齊做,我唔封咪。」AK即時反擊:「我封咪,係為咗走更長嘅路!」