曾比特首次做真人騷主持　公開捱眼瞓三大奇招

無綫J2早前拍攝以「捱眼瞓」為主題的電視真人騷《我要瞓鬥》，參賽者必須以兩人為一組，並肩捱過製作組安排的各種刁鑽又抵死的「催」眠任務及考驗，成功捱過60小時抵達「終點」的「瞓鬥者們」，將可挑戰贏取至少港幣十萬元的獎金獎品。

首度為電視節目擔任主持的曾比特（Mike），對於可以親眼一睹香港人各出奇招捱眼瞓，及與現場參賽者互動大表期待，揚言愛瞓覺的他，笑指隨着年紀漸長已甚少「捱夜唔瞓」，並大方分享抗眼瞓招數：「平時眼瞓會食香口膠者周圍行嚟行去同大聲唱歌提神。我覺得眼瞓好多時係因為坐喺度唔郁，坐吓坐吓就會好悶。所以你見我成日走嚟走去，係因為我成日都好眼瞓。」談到年輕時的捱夜歲月，Mike指很多時是為了去唱K，並指通宵翌日感覺奇妙：「我覺得最正係試過唱完通宵K再繼續去做嘢，感覺做所有嘢都好似好亢奮咁，當然再過多一日就冧咗係咁瞓。」並謂人生最難忘一次失眠，是因為在傍晚6點時喝了咖啡提神。