HOYTV疑抽《東張西望》水　借羅家英把口拉客

向來收視高企嘅無綫資訊節目《東張西望》，唔經唔覺原來已經播足17年，總集數超過5,000集！節目除發掘社會新聞，亦盛產「東張女神」，主持平均亮相時間極高，現任主持如利穎怡、吳幸美、梁敏巧等均快速上位，深入民心。

去年，HOYTV亦開始製作似足《東張西望》嘅節目《一線搜查》，仲專登邀請多位前「東張女神」如宋熙年、林希靈、黃愷怡等加入做主持，去年就荃灣眾安街企街流鶯風波，派主播直擊流鶯大本營，就被外界指過分相似《東張西望》拍攝手法。

近日HOYTV官網竟公開向《東張西望》抽水，為宣傳《一線搜查》，就借用周星馳電影《大內密探零零發》中羅家英嘅經典對白「豈有此理」做圖，並寫道：「【有突發事件除咗可以「東張西望」仲可以⋯⋯‼️】你屋企隻貓識打觔斗唔使再『東張西望』‼️見到UFO唔使再『東張西望』‼️因為仲可以報料我哋​《一線搜查》」公然拉客，嗌人睇佢哋嘅節目。