東方日報C1:馬國明湯洛雯約法三章設禁咀令

2023年03月19日 03:01
東網電視
更多新聞短片
絕世好男人馬國明將升呢人夫,他指與未來太太湯洛雯有協議,婚後會齊齊收緊拍攝激情戲的尺度,若劇情不太需要,他都寧願避開親嘴戲,不過,動作戲就樂意親身上陣,繼續搏到盡!
視帝馬國明於年初宣布向湯洛雯(靚湯)求婚成功,近日忙於拍劇的他,將婚禮事宜交由「老婆」靚湯主理,兩人由拍拖到步入人生另一階段,事事都有商有量,默契十足。而求婚成功後,原來兩人在工作上亦有約法三章,避免拍攝過分親熱的場口,以免打爛醋埕,惹不必要的爭拗,他謂:「我哋都有共識,阿湯再接戲都唔會係啲太裸露同親熱嘅戲,尤其依家我都會問啲女同事之後有場錫戲,你介唔介意,我唔介意佢哋話唔想錫,我仲幾欣賞,唔鍾意咪出聲,我之前同香香(岑麗香)拍《寶寶大過天》,佢拍之前講明佢唔係好想錫,因為老公唔係好鍾意,我唔會覺得佢唔專業,如果唔出聲但個心唔舒服又夾硬拍,咁反而唔好。」
問到若現在遇上一些激烈戲份是否都會主動出聲?他直言:「都會,有時場戲寫得太誇張,我會問導演係咪有需要,拍咗出唔出得街先,無謂浪費大家時間,其實睇打戲都好刺激,唔一定要睇啲親熱場口。」他續指婚後尺度會收得更緊,認為有些時候不一定要親嘴,可以錫面及錫額頭代替。雖然對親熱戲有所忌諱,但若果是動作場面,馬國明直言絕不介意親身上陣:「只要我有把握做到,而武指話安全,我都會做,因為親身做同替身做,觀眾係睇得出,如果連自己都冇把握就另計,因為受傷會影響拍攝進度。」
靚湯調養身體趕生BB
馬國明於新劇《隱形戰隊》中動作戲連場,搣甩天然呆形象化身型男,他不諱言動作戲雖然辛苦但值得:「其實動作戲難度唔係好大,因為我做開運動,所以體力上係應付到,反而之前演得太多醫生,初初拍攝時畀監製話我連行路都似醫生太斯文,希望今次畀到新鮮感觀眾。」他稱拍完該劇後發現自己對動作戲有興趣,因為現實中很難有真槍實彈的體驗。
搏命工作當然是希望照顧好屋企,對於即將成家立室,他坦言都有一定壓力:「要照顧多一個家庭,使錢方面唔可以太疏爽,以前我都鍾意手錶同車,早幾年見到隻錶好貴都會買,我有啲錶市值七位數,但當然買時唔使咁貴,咁依家唔會買,寧願慳錢,因為知道結婚要錢使。」
除此之外,他亦指跟靚湯有共識,靚湯會好好調養身體趕生BB,故他都不希望對方捱夜拍劇開工,而他亦會將財政大權奉上,每月只拿零用錢便可,果真絕世好男人!
更多新聞,請瀏覽東方日報網頁: