謝霆鋒腰力驚人狂轉4圈半　網民笑：難怪王菲咁愛佢！

男神謝霆鋒最近沉迷滑雪，不時拍片炫技，近日佢又解鎖滑雪新招式，挑戰原地旋轉4周嘅平花動作（Drive Spin），見佢大力一扭腰，即高速轉出4圈半即1620度，比起原本嘅1440度足足多出180度，相當犀利。有網民即聯想起以轉圈聞名嘅「灌籃王」Mac McClung，提到佢早前入樽賽表演凌空540度轉身入籃成為焦點，直指霆鋒嘅轉圈技術有過之而無不及，甚至有網友笑指霆鋒腰力過人，好腰好腎好男人，難怪天后王菲咁愛佢。