吳偉豪新劇升呢男一　老竇吳大強若客串唔想演父子

藝人吳偉豪出席無綫處境劇《愛·回家之開心速遞》宣傳，對於父親吳大強打入《中年好聲音》10強，偉豪坦言近期父子除了晚上返屋企見到之外，其餘時間甚少碰到：「佢成日出咗去練歌，返屋企又練，仲有結他同口琴。（大強5月開騷勁過你！）我都曾經上過紅館2次做嘉賓，Daddy都有，但今次佢就有份參與，頭先佢哋叫我買定啲飛派畀劇組一齊去撐場，我都諗緊到時我要開劇，唔知去唔去到，但點都會買飛畀親戚去睇。」

談到於新劇《非常檢控觀》升呢做「男一」，監製更有意邀大強客串，造就父孖檔上陣，偉豪表示也曾詢問父親意願：「佢都話冇問題，但未知實唔實行到，因為佢個期仲難度過我（想演咩角色？）現實生活已經係父子，劇就唔想。（演畀佢打？）都ok，我好掛畀佢打嘅日子。（細個成日畀爸爸打？）都有，但亦會鬧，4兄弟係百厭啲，所以Daddy威嚴啲，媽咪就溫文啲！」