Edan被批炒作「田牧CP」：係咪唔同得我朋友合照呀！

MIRROR成員呂爵安（Edan）與盧瀚霆（Anson Lo）因參演《大叔的愛》爆紅，並有「田牧CP」稱號。最近二人正身處日本拍攝新戲《盜月者》，恰巧在街上見到原版「大叔」吉田鋼太郎的廣告，於是合照留念。

唔少粉絲見到「田牧CP」再度合體非常興奮，但有網民就批評Edan：「得閒就學吓戲、練吓歌，唔好浪費時間喺度炒CP啦。」而Edan竟親自回覆：「得閒就睇吓書同屋企人、朋友傾吓計，唔好浪費時間喺度話人炒CP啦，次次我Po同佢嘅嘢都話炒CP，我係咪唔同得我朋友合照啊，你同你朋友去旅行會唔會Po相呀？你自己諗多冇所謂，唔好意圖扭曲我做嘅嘢同控制我Po乜先得㗎！」而一班「爵屎」（Edan粉絲）都留言力撐，指Edan的回應好Man、好有型呀！