王君馨親揭離巢TVB原因　自爆原本拒邀內地跳舞騷

王君馨（Grace）2021年底離開無綫，以獨立歌手「G. Racie」出歌，又到內地參加跳舞比賽，亦有拍片，嘗試多方面發展。日前佢接受訪問時，就親揭離巢無綫以及去內地參加舞蹈比賽嘅原因。

Grace透露與TVB傾續約時：「我望住自己喺呢間公司，都差不多13、14年，當我續約，係35到40歲，我仲喺呢間公司，我40歲嘅時候仲有冇勇氣離開呢？」因此佢想趁未做媽媽嘅時候，睇吓外面嘅世界：「我覺得我35歲可以任性多少少，咁我就可以Take呢個Risk出去闖下。」

去年佢參加內地《了不起舞社》真人騷，本來想拒絕邀請：「我一開始完全Say no，當然以前贏過一個跳舞比賽，但十幾年之後，身體有冇呢個狀態同能力可以再參加一個跳舞比賽呢？」但Grace受到「美國隊長」Chris Evans嘅啟發，所以決定挑戰自己！