許冠傑下月紅館開騷　破天荒開Live全球大合唱

「歌神」許冠傑（阿Sam）將於下月7日起舉行共7場紅館演唱會，主辦單位創辦人之一蕭潮順和鄭丹瑞今日（22日）舉行記者會，宣布4月14日尾場時，向超過50個城市，包括東南亞、美加、內地等地區，透過網上直播通行證同步輸出高清畫質畫面，直播睇騷之餘，更舉行全球大合唱。而Sam的演唱會嘉賓有林家謙、張敬軒、Serrini、陳凱彤及Georgina、古巨基。

蕭潮順表示：「阿Sam乜都要第一，第一個歌手做紅館、大球場演唱會，今次希望帶頭做全球直播，畀其他歌手參考，日後方便嚟唔睇嘅歌迷，兼且個騷會有24小時重溫，令各地歌迷不受時差所限。由於阿Sam好高要求，所以製作費又加多過百萬。（會唔會出DVD？）Sam話貓王皮禮士利都冇出DVD，全部都係做Live，所以佢咁多年都係出過一張DVD咋。」

同場的鄭丹瑞則表示阿Sam開直播演唱會只得一個要求：「就係要照顧埋弱勢社群，所以會免費贈過千個網上直播通行證畀慈善機構。」蕭潮順補充會聯絡護老院及劏房戶等，希望送上免費騷，傳送正能量，又指已送過百個網上通行證給阿Sam太太，方便她轉贈夏威夷的家人。